ಉತ್ತಮ ಗೋಮಾಂಸ ಹೇಳಿಕೆಯ ಜಾಡು ಹಿಡಿದು ಹೊರಟಾಗ…!!

 ಇದನ್ನೇ ಹಿಡಿದು ಬೇರೆ ಪಕ್ಷಗಳು ಬಿಜೆಪಿ ನಾಯಕರು ಎದುರಿಗೆ ಗೋವನ್ನು ಪ್ರೀತಿಸುವ ನಾಟಕ ಮಾಡಿ ಹಿಂದಿನಿಂದ ಗೋಮಾಂಸದ ಮಾರ್ಕೆಟಿಂಗ್ ಮಾಡುತ್ತಾರೆ ಎಂದು ಹೇಳುತ್ತಿದ್ದಾರೆ. ಆದರೆ ಈ ಅಪಪ್ರಚಾರದ ಹಿಂದೆ ಬೇರೆಯದ್ದೇ ಕಥೆ ಇದೆ. ಅಸಲಿಗೆ ಅದು ಶ್ರೀಪ್ರಕಾಶ್ ಅವರು ನಾಡಿದ್ದು ನಡೆಯಲಿರುವ ವಿಧಾನಸಭಾ ಕ್ಷೇತ್ರದ ಚುನಾವಣೆಗೆ ಸಂಬಂಧಿಸಿ ಕೊಟ್ಟ ಹೇಳಿಕೆ ಅಲ್ಲ. ಅದು ಭರ್ತಿ ನಾಲ್ಕು ವರ್ಷಗಳ ಹಿಂದಿನ ಅವರ ಭರವಸೆ. ಆಗ ಮಲ್ಲಪುರಂ ಲೋಕಸಭಾ ಕ್ಷೇತ್ರಕ್ಕೆ ಉಪಚುನಾವಣೆ ಘೋಷಣೆಯಾಗಿತ್ತು. ಕಾಂಗ್ರೆಸ್ಸಿನ ಹಿರಿಯ ಮುಖಂಡರೂ, ಮಾಜಿ ಕೇಂದ್ರ ಸಚಿವರೂ ಆಗಿದ್ದ ಇ-ಅಹ್ಮದ್ ನಿಧನರಾದ ನಿಮಿತ್ತ ಅಲ್ಲಿ ಲೋಕಸಭಾ ಸ್ಥಾನಕ್ಕೆ ಉಪಚುನಾವಣೆ ನಡೆದಿತ್ತು. ಶ್ರೀಪ್ರಕಾಶ್ ಅವರಿಗೆ ಬಿಜೆಪಿ ಟಿಕೆಟ್ ನೀಡಿತ್ತು. ಮಲ್ಲಪುರಂ ಹೇಗೆ ಎಂದರೆ ಅದು 65% ಮುಸ್ಲಿಮ್ ಮತದಾರರು ಇರುವ ಪ್ರದೇಶ. 5% ಕ್ರಿಶ್ಚಿಯನ್ ಮತದಾರರು ಇರುವ ಮತಕ್ಷೇತ್ರ. ಆ ನಿಟ್ಟಿನಲ್ಲಿ ಅಲ್ಲಿ ಬಿಜೆಪಿ ಗೆಲ್ಲಬೇಕಾದರೆ ಮುಸ್ಲಿಮರ ಮತಗಳು ನಿರ್ಣಾಯಕ. ಇದನ್ನು ಅರಿತ ಬಿಜೆಪಿ ಅಭ್ಯರ್ಥಿ ಗೋಮಾಂಸದ ವಿಷಯವನ್ನು ಎತ್ತಿದ್ದಾರೆ. ಆವತ್ತು ಅವರಿಗೆ ಆ ಕ್ಷೇತ್ರದಲ್ಲಿ ಗೆಲ್ಲಲು ಉತ್ತಮ ಗೋಮಾಂಸ ಪೂರೈಸುವ ಭರವಸೆ ನೀಡಲೇಬೇಕಿತ್ತಾ, ಅದು ಅವರ ವೈಯಕ್ತಿಕ ನಿರ್ಧಾರ. ಆದರೆ ಆ ಭರವಸೆ ಅವರು ಕೊಟ್ಟಿದ್ದು ಮಾತ್ರ ನಿಜ. ಆವತ್ತಿನ ಹೇಳಿಕೆ ಇವತ್ತು ವೈರಲ್ ಆಗುತ್ತಿದೆ. ಅದು ಇವತ್ತಿನ ಹೇಳಿಕೆ ಇರಲಿ, ನಾಲ್ಕು ವರ್ಷ ಅಂದರೆ 2017 ರ ಎಪ್ರಿಲ್ ನಲ್ಲಿ ಲೋಕಸಭಾ ಉಪಚುನಾವಣೆಗೆ ಕೊಟ್ಟ ಹೇಳಿಕೆ ಅದೇನೆ ಇರಲಿ, ಬಿಜೆಪಿ ಅಭ್ಯರ್ಥಿಗಳು ಕೇವಲ ಗೆಲ್ಲುವುದಕ್ಕಾಗಿ ಇಂತಹ ಹೇಳಿಕೆಯನ್ನು ಕೊಡುವುದರಿಂದ ಸಮಾಜಕ್ಕೆ ಯಾವ ಸಂದೇಶ ಹೋಗುತ್ತದೆ. ಅದು ಈ ಚುನಾವಣೆಯ ಭರವಸೆ ಅಲ್ಲ ಎಂದು ಬಿಜೆಪಿ ಸಮರ್ಥಿಸಬಹುದು. ಆದರೆ ನಾಲ್ಕು ವರ್ಷಗಳ ಹಿಂದೆ ಬಿಜೆಪಿ ಅಭ್ಯರ್ಥಿ ಕೊಟ್ಟಿದ್ದ ಹೇಳಿಕೆ ಹೌದು ತಾನೆ? ಆದರೆ ಯಾವಾಗ ಬೇಕಾದರೂ ಕೊಟ್ಟಿರಲಿ, ಬಿಜೆಪಿ ಅಭ್ಯರ್ಥಿ ಹಾಗೆ ಹೇಳುವುದು ಸರಿಯಲ್ಲ. ಕೇರಳದಲ್ಲಿ ಯುಡಿಎಫ್ ಹಾಗೂ ಎಲ್ ಡಿಎಫ್ ಎರಡರ ಜೊತೆಗೂ ಹೋರಾಡಬೇಕಾದ ಬಿಜೆಪಿ ಕೇವಲ ತನ್ನ ಸಿದ್ಧಾಂತದಿಂದಲೇ ಗೆಲ್ಲಬೇಕೆ ವಿನ: ತನ್ನದಲ್ಲದ ಸಿದ್ಧಾಂತದ ಜೊತೆಗೆ ಹೊಂದಾಣಿಕೆ ಮಾಡಿಕೊಂಡು ಸುಖವಿಲ್ಲ. ಹಾಗಂತ ಗೋಮಾಂಸದ ವಿಷಯದಲ್ಲಿ ಬೇರೆ ಬೇರೆ ರಾಜ್ಯಗಳಲ್ಲಿ ಅಧಿಕಾರದಲ್ಲಿರುವ ಬಿಜೆಪಿ ತನ್ನ ಸಿದ್ಧಾಂತವನ್ನು ಅಲ್ಲಿನ ನಾಗರಿಕರ ಮೇಲೆ ಹೇರಲು ಹೋಗಿಲ್ಲ. ಹಾಗಂತ ಬಿಜೆಪಿ ಸಿದ್ಧಾಂತದಿಂದ ದೂರ ಹೋಗಬಾರದು. ನಮ್ಮ ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಅಕ್ರಮ ಗೋಸಾಗಾಟ ವಿಷಯದಲ್ಲಿ ಗಲಾಟೆ ಆಗಿ ವಾರವೀಡಿ ಮಂಗಳೂರು ಬಂದ್ ಆದದ್ದನ್ನು ನಾವು ಅನುಭವಿಸಿದ್ದೇವೆ. ಅಮಾಯಕರ ಮೇಲೆ ಹಲ್ಲೆ, ಕೊಲೆಯತ್ನ ಮತ್ತು ಭಜರಂಗದಳದ ಮುಖಂಡರ ಹತ್ಯೆ ಕೂಡ ಇದೇ ವಿಷಯದಲ್ಲಿ ಆಗಿದೆ. ಆಗಿರುವಾಗ ನಮ್ಮದೇ ಪಕ್ಕದ ರಾಜ್ಯದಲ್ಲಿ ಇದೇ ವಿಷಯದಲ್ಲಿ ಯಾಕೆ ಬಿಜೆಪಿ ಸಾಫ್ಟ್ ಆಗಬೇಕು. ನಾನು ಹೇಳುವುದಾದರೆ ಹೀಗೆ ತಮ್ಮ ಗೆಲುವಿಗಾಗಿ ಪಕ್ಷದ ಸಿದ್ಧಾಂತವನ್ನು ಮೂಲೆಗೆ ಎಸೆಯುವವರಿಗೆ ತಕ್ಕ ಶಿಕ್ಷೆ ಆಗಬೇಕು. ಅವರಿಗೆ ಬಿಜೆಪಿಯವರೇ ಮತ ಹಾಕಬಾರದು.!!