ಅಂತ್ಯಕ್ರಿಯೆಗೆ ಮನೆಯವರೇ ಬರುವುದಿಲ್ಲ, ಹಾಗಿರುವಾಗ!!

ಇವತ್ತಿನ ದಿನಗಳಲ್ಲಿ ಪರಿಸ್ಥಿತಿ ಹೇಗಿದೆ ಎಂದರೆ ಒಬ್ಬ ಕೋವಿಡ್ ಸೊಂಕೀತ ಸತ್ತರೆ ಅವನ ಮನೆಯವರೇ ಶವಸಂಸ್ಕಾರಕ್ಕೆ ಬರದ ಪರಿಸ್ಥಿತಿ ಇದೆ. ಒಂದು ವೇಳೆ ಸತ್ತವರು ಹಿರಿಯ ಜೀವವಾದರೆ ಆ ವ್ಯಕ್ತಿಯ ಮಗ, ಪತ್ನಿ, ಸಹೋದರ, ಸಹೋದರಿಯರೇ ಶವದ ಸನಿಹಕ್ಕೆ ಬರುವುದಿಲ್ಲ. ಗರಿಷ್ಟ 20 ಜನರು ಬರಬಹುದು ಎಂದು ಸರಕಾರದಿಂದ ಅನುಮತಿ ಇದ್ದರೂ ಅನೇಕ ಶವದಹನದ ಸಂದರ್ಭದಲ್ಲಿ ಅವರ ಮನೆಯವರೇ ಇರಲ್ಲ. ಒಡಹುಟ್ಟಿದವರು ಬರಲ್ಲ. ಜನ್ಮಕೊಟ್ಟವರು ಬರಲ್ಲ. ಎಲ್ಲಿಯ ತನಕ ಅಂದರೆ ಕನಿಷ್ಟ ಮುಖ ನೋಡುವ ಅವಕಾಶ ಕೊಡುತ್ತೇವೆ ಎಂದರೂ ಬರದೇ ಇರುವವರು ಇದ್ದಾರೆ. ಬನ್ನಿ ಎಂದು ಕರೆದಾಗಲೇ ರಕ್ತ ಹಂಚಿಕೊಂಡು ಬದುಕಿದವರು ಬರದೇ ಇದ್ದಾಗ, ಯಾವುದೇ ಸಂಬಂಧವಿಲ್ಲದೇ, ಬೆರಳೆಣಿಕೆಯ ದಿನ ಕೂಡ ಒಟ್ಟಿಗೆ ಇಲ್ಲದವರು ಎಷ್ಟರಮಟ್ಟಿಗೆ ಪ್ರೀತಿ ತೋರಿಸಿಯಾರು? ಯಾಕೆಂದರೆ ಸತ್ತವರು ಹೇಗೋ ಸತ್ತು ಹೋದರು. ಹಾಗಂತ ನಾವು ಪಿಪಿಇ ಕಿಟ್ ಧರಿಸಿಯೂ ಕೊರೊನಾ ಬರಲ್ಲ ಎಂದು ಏನು ಗ್ಯಾರಂಟಿ ಎಂದು ಆಸ್ಪತ್ರೆಯ ಸಿಬ್ಬಂದಿಗಳು ಹಾಗೇ ವರ್ತಿಸಿರಬಹುದು. ಅದನ್ನು ಅಮಾನವೀಯ ಎಂದು ಹೇಳಲೇಬಾರದು. ಟಿವಿ ಸ್ಟುಡಿಯೋದಲ್ಲಿ ಕುಳಿತು ಬಡಪಾಯಿ ಸಿಬ್ಬಂದಿಗಳನ್ನು ತೆಗಳುವುದು ತುಂಬಾ ಸುಲಭ. ಆದರೆ ವಾಸ್ತವ ಎಷ್ಟು ಮಂದಿ ಮಾಧ್ಯಮದವರಿಗೆ ಗೊತ್ತಿದೆ.

ಇನ್ನು ಹಿಂದೂ ಶಾಸ್ತ್ರದ ಪ್ರಕಾರ ಶವದಹನದ ಮೂರನೇ ದಿನ ಬೂದಿ ತೆಗೆದುಕೊಂಡು ಹೋಗಬೇಕು ಎನ್ನುವ ಸಂಪ್ರದಾಯವಿದೆ. ಕೋವಿಡ್ 19 ರೋಗಿಯ ಶವದಹನದ ಬಳಿಕ ಬೂದಿಯನ್ನು ತೆಗೆದುಕೊಂಡು ಹೋಗಲು ಕೂಡ ಎಷ್ಟೋ ಸಲ ಯಾರೂ ತಯಾರಿರುವುದಿಲ್ಲ. ಒಂದು ಹೆಣವನ್ನು ಸುಟ್ಟ ಬಳಿಕ ಅದರಲ್ಲಿ ಕೋವಿಡ್ 19 ವೈರಾಣು ಇರಲು ಸಾಧ್ಯವೇ ಇಲ್ಲ ಎಂದು ವೈಜ್ಞಾನಿಕವಾಗಿ ಸಾಬೀತಾಗಿದೆ. ಅದಕ್ಕಾಗಿ ವೈದ್ಯರು ದಿನಕ್ಕೆ ನಾಲ್ಕು ಸಲ ಬಿಸಿನೀರು ಮಾಡಿ ಕುಡಿಯಿರಿ ಎಂದು ಹೇಳುವುದು. ಒಂದು ವೇಳೆ ಕೋವಿಡ್ 19 ವೈರಾಣು ನಿಮ್ಮ ಗಂಟಲಭಾಗದಲ್ಲಿ ಇದ್ದರೆ ಬಿಸಿ ನೀರು ಹಾಕಿದ ಕೂಡಲೇ ಅದು ಅಲ್ಲಿಂದ ಇಳಿದು ಹೊಟ್ಟೆಯನ್ನು ಸೇರುತ್ತದೆ. ಬಿಸಿಯಲ್ಲಿ ಈ ವೈರಸ್ ಉಳಿಯುವುದಿಲ್ಲ ಎಂದು ಗೊತ್ತಿದ್ದರೂ ನಮ್ಮ ಜನ ಹೆದರುತ್ತಾರೆ ಎಂದಾದರೆ ಆ ಬಡಪಾಯಿ ಆಸ್ಪತ್ರೆಯ ಸಿಬ್ಬಂದಿಗಳಿಗೆ ಪಾಪ ಹೆದರಿಕೆ ಇರಲ್ವಾ? ಒಂದು ವೇಳೆ ಹೆದರಿಕೆ ಸತ್ತವನ ಮನೆಯವರಿಗೆ ಇದೆ ಎಂದಾದರೆ ಆಸ್ಪತ್ರೆಯ ಸಿಬ್ಬಂದಿಗಳಿಗೆ ಇರಬಾರದೇ? ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಸತ್ತವರ ಸಂಖ್ಯೆ 20 ದಾಟಿದೆ. ಇಲ್ಲಿಯೇ ಶವದಹನಕ್ಕೆ ಆಗಿರುವ ಅಡಚಣೆ ಗೊತ್ತೆ ಇದೆ. ಇಷ್ಟೆಲ್ಲಾ ಜಾಗೃತಿ ಆದ ಬಳಿಕವೂ ಇತ್ತೀಚೆಗೆ ಮುಸ್ಲಿಂ ಭಾಂದವರೊಬ್ಬರು ಸತ್ತಾಗ ಅವರ ಶವದಫನಕ್ಕೆ ಆದ ಕಿರಿಕಿರಿ ಅಷ್ಟಿಷ್ಟಲ್ಲ. ಶವ ದಫನ ಮಾಡುವುದು ಇಲ್ಲಿ ಬೇಡಾ, ಅಲ್ಲಿ ಬೇಡಾ ಎಂದು ಹೇಳುವ ಜನ ಆ ಹೆಣಗಳನ್ನು ತೆಗೆದುಕೊಂಡು ಬರುವ ಕನಿಷ್ಟ ಸಂಬಳದ ಸಿಬ್ಬಂದಿಗಳ ಜೀವವನ್ನು ಗಮನಿಸಿದ್ದೀರಾ? ಈಗಾಗಲೇ ಕೊರೊನಾ ಯಾರನ್ನೂ ಬಿಟ್ಟಿಲ್ಲ. ಲ್ಯಾಬ್ ಟೆಕ್ನಿಶಿಯನ್ ಅವರಿಂದ ಹಿಡಿದು ಉನ್ನತ ವೈದ್ಯರಿಗೂ ಬಂದಿದೆ. ಹಾಗಿರುವಾಗ ಒಂದು ತಪ್ಪನ್ನು ಹಿಡಿದು ಆಸ್ಪತ್ರೆಯ ಸಿಬ್ಬಂದಿಗಳನ್ನು ಅಮಾನತು, ಕೆಲಸದಿಂದ ತೆಗೆಯುವುದು ಎಲ್ಲಾ ಸರಿಯಲ್ಲ. ಈಗಾಗಲೇ ಕೆಲಸಕ್ಕೆ ಜನ ಸಿಗುವುದು ಕಷ್ಟವಾಗಿದೆ. ಹಾಗಿರುವಾಗ ಟಿವಿಯವರ ಆರ್ಭಟದಿಂದ ಇನ್ನಷ್ಟು ಆಸ್ಪತ್ರೆಯ ಸಿಬ್ಬಂದಿಗಳು ಜೀವ ಉಳಿದರೆ ಸಾಕು, ದೊಡ್ಡ ನಮಸ್ಕಾರ ಎಂದು ಹೇಳಿದರೆ ಮುಂದೆ ಗತಿ ಏನು!