ಟೀ ಇಂಡಿಯಾ ವಿಕೆಟ್ ಕೀಪರ್ – ಬ್ಯಾಟ್ಸಮನ್ , ಮಂಗಳೂರು ಮೂಲದ ಕೆ.ಎಲ್ ರಾಹುಲ್ ನವೆಂಬರ್ 8 ರಂದು ಸಂಭ್ರಮದ ವಿಷಯವೊಂದನ್ನು ತಮ್ಮ ಸೋಶಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ಅದು ಚೊಚ್ಚಲ ಮಗುವಿಗೆ ಅಪ್ಪನಾಗುವ ಖುಷಿ. ಕಳೆದ ವರ್ಷ ಅದ್ದೂರಿಯಾಗಿ ಮದುವೆಯಾಗಿದ್ದ ಕ್ರೀಡಾ ತಾರೆ ರಾಹುಲ್ ಮತ್ತು ಚಿತ್ರನಟಿ ಅಥಿಯಾ ಶೆಟ್ಟಿ ಮುಂದಿನ ವರ್ಷ ಪೋಷಕರಾಗಿ ಬದುಕಿನಲ್ಲಿ ಭಡ್ತಿ ಹೊಂದಲಿದ್ದಾರೆ. ಈ ಬಗ್ಗೆ ಬರೆದಿರುವ ರಾಹುಲ್ ” ನಮ್ಮ ಸುಂದರ ಆರ್ಶೀವಾದ ಶೀಘ್ರದಲ್ಲಿ ಬರಲಿದೆ” ಎಂದಿದ್ದಾರೆ.
ರಾಹುಲ್ ಸದ್ಯ ಆಸ್ಟ್ರೇಲಿಯಾದಲ್ಲಿ ಟೆಸ್ಟ್ ಸರಣಿ ಆಡುತ್ತಿದ್ದಾರೆ. ಆಸ್ಟ್ರೇಲಿಯಾ ಎ ತಂಡದ ವಿರುದ್ಧ ಅವರ ಪ್ರದರ್ಶನ ನೀರಸವಾಗಿದ್ದರೂ ಬದುಕಿನಲ್ಲಿ ಅವರ ಹೊಸ ಆಯಾಮ ಮಾತ್ರ ಅವರ ಅಭಿಮಾನಿಗಳಲ್ಲಿ ಸಂತಸವನ್ನು ತಂದಿದೆ. ಅಥಿಯಾ ತಂದೆ ಖ್ಯಾತ ನಟ ಸುನೀಲ್ ಶೆಟ್ಟಿಯವರೂ ವಿದೇಶದಲ್ಲಿ ಶೂಟಿಂಗ್ ನಲ್ಲಿದ್ದಾರೆ. ಒಟ್ಟಿನಲ್ಲಿ 2019 ರಿಂದಲೇ ಪ್ರೀತಿ ಪ್ರೇಮದ ಬಲೆಯಲ್ಲಿದ್ದ ರಾಹುಲ್ ಹಾಗೂ ಅಥಿಯಾ ತಮ್ಮ ಪ್ರೀತಿಯನ್ನು 2019 ರ ಅಂತ್ಯದಲ್ಲಿ ಬಹಿರಂಗಪಡಿಸಿದ್ದರು. 2023 ರ ಜನವರಿ 23 ರಂದು ಕೆ.ಎಲ್ ರಾಹುಲ್ ಹಾಗೂ ಅಥಿಯಾ ವಿವಾಹ ಬಂಧನಕ್ಕೆ ಒಳಗಾಗಿದ್ದರು. ಇಬ್ಬರ ಮೂಲವೂ ದಕ್ಷಿಣ ಕನ್ನಡ ಜಿಲ್ಲೆಯಾಗಿರುವುದು ವಿಶೇಷ.
