ಸ್ಮೃತಿ ಇರಾನಿ ಸಾಸ್ ಬಿ ಕಬಿ ಭಹೂ ತೀ – 2 ನಿಂದ ಮತ್ತೆ ಕಿರುತೆರೆಗೆ ವಾಪಾಸ್!

ಒಂದು ಕಾಲದಲ್ಲಿ ಪ್ರಖ್ಯಾತವಾಗಿದ್ದ ಹಿಂದಿ ಧಾರಾವಾಹಿ ಕ್ಯೂಂ ಕೀ ಸಾಸ್ ಬಿ ಕಬೀ ಭಹೂ ತೀ ನಿಂದ ಜನಮಾನಸದಲ್ಲಿ ಪ್ರಖ್ಯಾತಿಯನ್ನು ಪಡೆದಿದ್ದ ಸ್ಮೃತಿ ಇರಾನಿ ಅದೇ ಇಮೇಜಿನೊಂದಿಗೆ ರಾಜಕೀಯ ಕ್ಷೇತ್ರವನ್ನು ಪ್ರವೇಶಿಸಿದ್ದರು. ಭಾರತೀಯ ಜನತಾ ಪಾರ್ಟಿಯ ಕೇಂದ್ರದ ನಾಯಕರಾಗಿಯೂ ಕೆಲಸ ಮಾಡಿದ ಸ್ಮೃತಿ 2019 ರ ಲೋಕಸಭಾ ಚುನಾವಣೆಯಲ್ಲಿ ಉತ್ತರಪ್ರದೇಶದ ಅಮೇಠಿಯಲ್ಲಿ ಕಾಂಗ್ರೆಸ್ ಸರ್ವೋಚ್ಚ ನಾಯಕ ರಾಹುಲ್ ಗಾಂಧಿಯವರನ್ನು ಸೋಲಿಸಿದ್ದರು. ಮೋದಿ ಮೊದಲ ಬಾರಿ ಪ್ರಧಾನಿಯಾದಾಗಲೇ 2014 ರಲ್ಲಿ ಅವರನ್ನು ರಾಜ್ಯಸಭಾ ಸದಸ್ಯರನ್ನಾಗಿ ಮಾಡಿದ್ದರು. ಕೇಂದ್ರದಲ್ಲಿ 2014 ರಿಂದ 2024 ರ ತನಕ ಮಂತ್ರಿಯನ್ನಾಗಿ ಮಾಡಿದ್ದರು. ಕೇಂದ್ರದಲ್ಲಿ ಮೋದಿಯವರ ಸಚಿವ ಸಂಪುಟದಲ್ಲಿ ಹತ್ತು ವರ್ಷಗಳ ತನಕ ಸಚಿವೆಯಾಗಿದ್ದರು.

2019 ರಿಂದ 2024 ರವರೆಗೆ ಅಮೇಠಿಯಲ್ಲಿ ಸಂಸದರಾಗಿ, ಒಂದಿಷ್ಟು ಅಭಿವೃದ್ಧಿ ಕಾರ್ಯಗಳನ್ನು ನಡೆಸಿದರೂ 2024 ರಲ್ಲಿ ಅಮೇಠಿಯ ಜನ ಅವರ ಕೈ ಹಿಡಿಯಲಿಲ್ಲ. ಗಾಂಧಿ ಕುಟುಂಬದ ಆಪ್ತ ಕಿಶೋರಿಲಾಲ್ ಶರ್ಮಾ ಅವರ ವಿರುದ್ಧ ಸೋತು ರಾಜಕಾರಣದಲ್ಲಿ ಒಂದಿಷ್ಟು ನೈಪಥ್ಯಕ್ಕೆ ಸರಿದಿದ್ದರು. ಅವರನ್ನು ರಾಜ್ಯಸಭೆಗೆ ಆಯ್ಕೆ ಮಾಡಲಾಗುತ್ತದೆ ಎನ್ನುವ ವದಂತಿ ಇದ್ದರೂ ಅದು ಕಳೆದ ಒಂದು ವರ್ಷದಲ್ಲಿ ಆಗಿಲ್ಲ. ಇನ್ನೊಂದೆಡೆ ರಾಷ್ಟ್ರೀಯ ಅಧ್ಯಕ್ಷೆಯನ್ನಾಗಿ ಅವರನ್ನು ಭಾಜಪಾ ಹೈಕಮಾಂಡ್ ನೇಮಿಸುತ್ತದೆ ಎಂದು ಹೇಳಲಾಗುತ್ತದೆಯಾದರೂ ಅದು ಇನ್ನೂ ಜಾರಿಗೆ ಬಂದಿಲ್ಲ.

ಈ ಕಾಲಘಟ್ಟದಲ್ಲಿ ಮತ್ತೆ ಲೈಮ್ ಲೈಟಿಗೆ ಬರಲು ಸ್ಮೃತಿ ಇರಾನಿ ಸಿದ್ಧತೆಯನ್ನು ನಡೆಸಿದ್ದಾರೆ.
ಏಕ್ತಾ ಕಪೂರ್ ನಿರ್ಮಾಣದ ಕ್ಯೂಂ ಕಿ… ಧಾರಾವಾಹಿಯಲ್ಲಿ ನಟಿಸಲು ಆರಂಭಿಸಿರುವ ಅವರಿಗೆ ಚಿತ್ರೀಕರಣದಲ್ಲಿ ಝಡ್ ಪ್ಲಸ್ ಭದ್ರತಾ ವ್ಯವಸ್ಥೆ ನೀಡಲಾಗಿದೆ. ಅವರು ಚಿತ್ರೀಕರಣದಲ್ಲಿ ಇದ್ದಾಗ ಕಠಿಣ ನಿಯಮಗಳನ್ನು ಧಾರಾವಾಹಿ ತಂಡ ಜಾರಿಗೆ ತಂದಿದ್ದು, ಯಾವುದೇ ಫೋನ್ ತೆಗೆದುಕೊಂಡು ಚಿತ್ರೀಕರಣದ ಜಾಗದಲ್ಲಿ ಇರುವಂತಿಲ್ಲ. ಕೇವಲ ಸ್ಮೃತಿ ಇರಾನಿ, ಅಮರ್ ಉಪಾಧ್ಯಾಯ ಹಾಗೂ ನಿರ್ಮಾಪಕಿ ಏಕ್ತಾ ಕಪೂರ್ ಅವರ ಮೊಬೈಲ್ ಫೋನ್ ಗಳನ್ನು ಹೊರತುಪಡಿಸಿ ಉಳಿದ ಎಲ್ಲರ ಫೋನ್ ಗಳನ್ನು ಟ್ರಾಪ್ ಮಾಡುವ ವ್ಯವಸ್ಥೆ ಮಾಡಲಾಗಿದೆ. ನಾಗರಿಕರು ಚಿತ್ರೀಕರಣದ ಸ್ಥಳದ ಹತ್ತಿರದಲ್ಲಿಯೂ ಸುಳಿಯದಂತೆ ನೋಡಿಕೊಳ್ಳಲಾಗಿದೆ.

ಒಂದೂವರೆ ದಶಕದ ನಂತರ ಈ ಪ್ರಖ್ಯಾತ ಧಾರಾವಾಹಿಯ ಎರಡನೇ ಭಾಗ ಮತ್ತೆ ಪ್ರಸಾರಗೊಳ್ಳಲು ಅಣಿಯಾಗಿದ್ದು, ಸ್ಮೃತಿ ಇರಾನಿ ಹೇಗೆ ಅಭಿನಯಿಸಿದ್ದಾರೆ ಎನ್ನುವ ಕುತೂಹಲ ಜನರಿಗೆ ಇದೆ. ಅದರೊಂದಿಗೆ ಅವರ ಹಿಂದಿನ ಭಾಗದ ಜೋಡಿ ಅಮರ್ ಉಪಾಧ್ಯಾಯ ಕೂಡ ಜೊತೆಯಾಗಲಿದ್ದು, ಇದು ಕೂಡ ಹೆಣ್ಣುಮಕ್ಕಳ ಕುತೂಹಲವನ್ನು ಕೆರಳಿಸಿದೆ.

ತುಳಸಿ ಎನ್ನುವ ಹೆಸರಿನಿಂದ ಧಾರಾವಾಹಿ ಪ್ರಿಯರ ಮನೆಮಾತಾಗಿದ್ದ ಸ್ಮೃತಿ ಆ ಧಾರಾವಾಹಿಯಲ್ಲಿ ಸುಮಾರು ಎಂಟು ವರ್ಷ ಅಭಿನಯಿಸಿದ್ದರು. ಇದರ ಪ್ರಖ್ಯಾತಿ ಅವರನ್ನು ರಾಜಕೀಯ ಕ್ಷೇತ್ರಕ್ಕೆ 2003 ರಲ್ಲಿ ತೆಗೆದುಕೊಂಡು ಹೋಗಿತ್ತು. ಈಗ ಮುಂದಿನ ಭಾಗ ಯಾವಾಗ ಟಿವಿಯಲ್ಲಿ ಬರಲಿದೆ ಎಂದು ಹೇಳಲಾಗಿಲ್ಲ.