ಒಂದೇ ಹೆರಿಗೆಯಲ್ಲಿ ನಾಲ್ಕು ಮಕ್ಕಳಿಗೆ ಜನ್ಮ ನೀಡಿರುವ ಅಪರೂಪದ ಘಟನೆ ಮಂಗಳೂರಿನ ಖಾಸಗಿ ಆಸ್ಪತ್ರೆ ಫಾದರ್ ಮುಲ್ಲರ್ ನಲ್ಲಿ ನಡೆದಿದೆ. ನಾಲ್ಕು ಮಕ್ಕಳಲ್ಲಿ ಎರಡು ಗಂಡು ಮತ್ತು ಎರಡು ಹೆಣ್ಣು ಮಕ್ಕಳಾಗಿದ್ದು, ಇದು ಸಿಜೇರಿಯನ್ ಮೂಲಕ ನಡೆದ ಹೆರಿಗೆಯಾಗಿದೆ. ಈ ನಾಲ್ಕು ಮಕ್ಕಳಿಗೆ ಜನ್ಮ ನೀಡಿದ ತಾಯಿಯ ಹೆಸರು ಬಾನೋತ್ ದರ್ಗಾ ಅವರು ಆರೋಗ್ಯವಾಗಿದ್ದಾರೆ. ಮಕ್ಕಳಿಗೆ ಐಸಿಯುವಿನಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ.
ಈ ಬಗ್ಗೆ ಮಾತನಾಡಿದ ಸ್ತ್ರೀರೋಗ ತಜ್ಞೆ ಡಾ. ಜೋಯ್ಲೀನ್ ಡಿ ಅಲ್ಮೇಡಾ ಅವರು ” ಏಳು ಲಕ್ಷ ಜನರಲ್ಲಿ ಒಬ್ಬರು ಮಾತ್ರ ಈ ರೀತಿ ಅಪರೂಪಕ್ಕೆ ಹೆಚ್ಚು ಮಕ್ಕಳಿಗೆ ಜನ್ಮ ನೀಡುತ್ತಾರೆ” ಎಂದಿದ್ದಾರೆ. ಬಾನೋತ್ ದರ್ಗಾ ಅವರು ಮೂಲತ: ತೆಲಂಗಾಣದವರು.
ಇನ್ನು ಜಗತ್ತಿನಲ್ಲಿ ಒಂದೇ ಹೆರಿಗೆಯಲ್ಲಿ ಅತೀ ಹೆಚ್ಚು ಜನ್ಮ ನೀಡಿದ ದಾಖಲೆ ಮೊರೆಕ್ಕಾದ ಕಾಸಾಬ್ಲಾನ್ಕಾದಲ್ಲಿ ಹಲೀಮಾ ಸಿಸ್ಸೇ ಅವರ ಹೆಸರಿನಲ್ಲಿದೆ. ಈ ಗಿನ್ನೆಸ್ ದಾಖಲೆ 2021 ರಲ್ಲಿ ಜರುಗಿದ್ದು ಸಿಸ್ಸೇ ಏಕಕಾಲದಲ್ಲಿ 9 ಮಕ್ಕಳಿಗೆ ಜನ್ಮ ನೀಡಿದ್ದರು. ಇದಕ್ಕೂ ಹಿಂದೆ 2009 ರಲ್ಲಿ ನಾದ್ಯಾ ಸುಲೇಮನ್ ಅವರು ಎಂಟು ಮಕ್ಕಳಿಗೆ ಜನ್ಮ ನೀಡಿ ದಾಖಲೆ ಬರೆದಿದ್ದರು.
