ಜೈಲಿಗೆ ಹೋಗಿ ಬಂದವರನ್ನೇ ರಾಜ್ಯಾಧ್ಯಕ್ಷ ಮಾಡಿದ ಹೆಮ್ಮೆ ಕಾಂಗ್ರೆಸ್ಸಿಗರಿಗೆ!!

ಇನ್ನು ಇಡೀ ಡಿಕೆಶಿ ಬಳಗ ತಮ್ಮ ನಾಯಕನ ಪದಗ್ರಹಣಕ್ಕೆ ಅನುವು ಮಾಡಿಕೊಟ್ಟಿರುವುದಕ್ಕೆ ಮುಖ್ಯಮಂತ್ರಿ ಯಡ್ಡಿಯವರಿಗೆ ಧನ್ಯವಾದ ಹೇಳಲೇಬೇಕು. ಇದೇ ಯಡ್ಡಿ ಪಾಪದವರ ಮದುವೆಯಾದರೆ 50 ಜನ ಮಾತ್ರ ಸೇರಬೇಕು ಎಂದು ನೋಟಿಸ್ ಬಿಡುತ್ತಾರೆ. ಅದೇ ಡಿಕೆಶಿ ಪದಗ್ರಹಣದ ಸಭಾಂಗಣ ನೀವು ಟಿವಿಯಲ್ಲಿ ಪ್ರಸಾರವಾಗುವಾಗ ನೋಡಿರಬಹುದು. ತುಂಬಿ ತುಳುಕುತ್ತಿತ್ತು. ಹಾಗೆ ಅವಕಾಶ ಮಾಡಿಕೊಡಲು ಸಾಧ್ಯವಿರುವುದು ಸ್ವತ: ಮುಖ್ಯಮಂತ್ರಿ ಅವರಿಗೆ ಮಾತ್ರ. ಸಾಮಾಜಿಕ ಅಂತರ ಎಲ್ಲಿತ್ತು. ಎಷ್ಟೇ ಮಧ್ಯಮ ವರ್ಗದವರ ಮದುವೆಯಾದರೂ ನೂರಿನ್ನೂರು ಜನರು ಮಾಮೂಲಿ. ಆದರೆ ಮದುವೆಗಳಿಗೆ 50 ಜನ ಮಾತ್ರ ಎಂದು ಹೇಳುವಾಗ ಯಡ್ಡಿ ಸರಕಾರಕ್ಕೆ ಯಾವುದೇ ಬೇಸರವಿಲ್ಲ. ಅದೇ ಡಿಕೆಶಿ ತಮ್ಮ ಕಾರ್ಯಕ್ರಮವನ್ನು 50 ಜನರೊಂದಿಗೆ ಮಾತ್ರ ಮಾಡಬಹುದಿತ್ತಲ್ಲ. ಮಾಡಿಲ್ಲ. ಯಾಕೆಂದರೆ ಅವರು ಸರಕಾರದ ನಿಯಮಗಳನ್ನು ಕ್ಯಾರ್ ಮಾಡುವುದಿಲ್ಲ. ಕೇಸು ಹಾಕಿದರೆ “ಥೂ, ಹೋಗಯ್ಯ, ಯಡ್ಡಿ ನಿನ್ನ ಕೇಸಿಗೆ ಯಾವ ನನ್ಮಗ ಹೆದರುತ್ತಾನೆ” ಎಂದು ಹೇಳಿಬಿಡುತ್ತಾರೆ. ಅಂತವರ ಮೇಲೆ ಕೇಸು ಹಾಕುವ ಮೀಟರ್ ಈಗಿನ ಬಿಜೆಪಿ ಸರಕಾರಕ್ಕೆ ಇಲ್ಲ. ಕೇಸು ಜಡಿಯುವ ತಾಕತ್ತು ಯಡ್ಯೂರಪ್ಪ ಸರಕಾರಕ್ಕೆ ಇದ್ದರೆ ಅದನ್ನು ಮಾಡಿ ತೋರಿಸಲಿ. ಅಲ್ಲಿ ನೆರೆದಿದ್ದ ಎಷ್ಟು ಮಂದಿಯ ಬಳಿ ಮಾಸ್ಕ್ ಇತ್ತು. ವಿಡಿಯೋ ನೋಡುವಾಗ ಯುಟಿ ಖಾದರ್ ಮಾಸ್ಕ್ ಮುಖಕ್ಕೆ ಹಾಕದೇ ಕುಳಿತಿದ್ದರು. ಆದ್ದರಿಂದ ಊರಿನವರಿಗೆ ಯುಟಿ ಖಾದರ್ ಅಲ್ಲಿರುವುದು ಗೊತ್ತಾಯಿತು. ಖಾದರ್ ಅಕ್ಕಪಕ್ಕ ಇಬ್ಬರು ಎಷ್ಟು ಒತ್ತೊತ್ತಾಗಿ ಕುಳಿತಿದ್ದರು ಎಂದರೆ ಖಾದರ್ ಮಂಗಳೂರಿಗೆ ಬಂದ ನಂತರ ಅವರ ಬಳಿ ಹೋಗುವವರು ಸ್ವಲ್ಪ ಎಚ್ಚರಿಕೆ ವಹಿಸಿಕೊಂಡರೆ ಒಳ್ಳೆಯದು.

ಇನ್ನು ಈ ವರ್ಚುವಲ್ ರ್ಯಾಲಿಯನ್ನು ಕಾಂಗ್ರೆಸ್ಸಿಗರಿಗೆ ಹೇಳಿಕೊಟ್ಟಿದ್ದೇ ಬಿಜೆಪಿ. ಕೆಲವು ದಿನಗಳ ಹಿಂದೆ ಕೇಂದ್ರ ಗೃಹಸಚಿವ ಅಮಿತ್ ಶಾ ಇಂತಹುದೇ ವರ್ಚುವಲ್ ರ್ಯಾಲಿ ಮೂಲಕವೇ ಬಿಹಾರ ಚುನಾವಣೆಗೆ ಚಾಲನೆ ನೀಡಿದ್ದರು. ಆಗ ಕಾಂಗ್ರೆಸ್ ಪಕ್ಷ ಕೊರೊನಾ ಸಮಯದಲ್ಲಿ ಇಂತಹ ರ್ಯಾಲಿಗಳು ಬೇಕಾ ಎಂದು ಬಿಜೆಪಿಯನ್ನು ಹಂಗಿಸಿತ್ತು. ಈಗ ಕೊರೊನಾ ಮುಗಿಲು ಮುಟ್ಟುತ್ತಿರುವಾಗ ಅರ್ಜೆಂಟಾಗಿ ದೊಡ್ಡವನಾದ ಮದುಮಗ ಗಡಿಬಿಡಿಯಲ್ಲಿ ಹಸೆಮಣೆಗೆ ಏರಲು ಒದ್ದಾಡುವವನಂತೆ ಡಿಕೆಶಿ ಅಧ್ಯಕ್ಷ ಸ್ಥಾನವನ್ನು ಏರಿಬಿಟ್ಟಿದ್ದಾರೆ. ಅವರು ಇನ್ನೆರಡು ತಿಂಗಳು ಬಿಟ್ಟು ಈ ಕಾರ್ಯಕ್ರಮ ಇಟ್ಟುಕೊಂಡಿದ್ದರೆ ಕಳೆದುಕೊಳ್ಳುವುದು ಏನೂ ಇರಲಿಲ್ಲ. ಆದರೆ ಡಿಕೆಶಿಗೆ ತಕ್ಷಣ ತಮ್ಮ ಸ್ಥಾನವನ್ನು ಆಕ್ರಮಿಸಿ ತಮ್ಮದೇ ಪಕ್ಷದ ಮುಖಂಡರ ಎದುರು ತಮ್ಮ ಪವರ್ ತೋರಿಸಬೇಕಿತ್ತು. ಒಟ್ಟಿನಲ್ಲಿ ಸಾಮಾಜಿಕ ಜಾಲತಾಣಗಳನ್ನು ನಾವು ಕೂಡ ಉಪಯೋಗಿಸಿ ಅಧಿಕಾರಕ್ಕೆ ಬರುತ್ತೇವೆ ಎಂದು ಸೂಕ್ಷ್ಮವಾಗಿ ಕಾಂಗ್ರೆಸ್ ನಿನ್ನೆ ತೋರಿಸಿಕೊಟ್ಟಿದೆ. ಇದರೊಂದಿಗೆ ರಾಜ್ಯ  ಬಿಜೆಪಿಗೆ ಇನ್ನು ಸವಾಲು ಹೆಚ್ಚಾಗಲಿವೆ. ಅದೇನೆಂದರೆ ಸಿದ್ಧರಾಮಯ್ಯ ಕೇವಲ ಹುಂಬತನದಿಂದ ಅಧಿಕಾರಕ್ಕೆ ಏರಿದವರು. ಅಂತವರನ್ನು ಹೇಗಾದರೂ ನಿಭಾಯಿಸಬಹುದಿತ್ತು. ಆದರೆ ಡಿಕೆಶಿಗೆ ಹುಂಬತನದೊಂದಿಗೆ ಪಕ್ಕಾ ಪ್ಲಾನಿಂಗ್ ಮಾಡಿ ಫೀಲ್ಡಿಗೆ ಇಳಿಯುವ ಶೈಲಿ ಗೊತ್ತಿದೆ. ಯಾರು ತುಂಬಾ ಪ್ಲಾನಿಂಗ್ ಮಾಡಿ, ಹೋಂವರ್ಕ್ ಮಾಡಿ, ಫೀಲ್ಡರ್ ಗಳನ್ನು ಸೆಟ್ ಮಾಡಿ, ದೂರದೃಷ್ಟಿ ಇಟ್ಟು ಬೇಕಾದ ಆಯುಧಗಳನ್ನು ಒಟ್ಟು ಮಾಡಿಯೇ ರಣಭೂಮಿಗೆ ಇಳಿಯುತ್ತಾರೋ ಅವರಲ್ಲಿ ಗೆಲ್ಲುವ ಛಲ ಜಾಸ್ತಿಯೇ ಇರುತ್ತದೆ. ಸಿದ್ದು ಅವರಲ್ಲಿ ಅದು ಇರಲಿಲ್ಲ. ಡಿಕೆಶಿಗೆ ಅದೇ ವರದಾನ. ಆದ್ದರಿಂದಲೇ ಅವರು ಜಿಲ್ಲಾ ಪಂಚಾಯತ್ ಸದಸ್ಯನಿಂದ ರಾಜ್ಯಾಧ್ಯಕ್ಷನ ತನಕ ಬಂದಿರುವುದು!