ಎಚ್ಡಿಕೆ ಶ್ರೀಲಂಕಾ ಭೇಟಿ ಹೊರಬೀಳುತ್ತಿದ್ದಂತೆ ಸಿಎಂ ಜೊತೆ “ಮಾತುಕತೆ!!”

ದಿನಕ್ಕೊಂದು ರೀತಿಯಲ್ಲಿ ಶಾಸಕ ಜಮೀರ್ ಅಹ್ಮದ್ ಮಾತನಾಡುತ್ತಿರುವುದು ನೋಡಿದರೆ ಇದೊಂದು ಅಪ್ಪಟ ಧಾರಾವಾಹಿಯಂತೆ ಕಾಣುತ್ತಿದೆ. ಅವರು ಧಾರಾವಾಹಿ ನಟರಾಗಿದ್ದರೆ ನಿಜಕ್ಕೂ ವೀಕ್ಷಕರಿಗೆ ಅತ್ಯಂತ ಖುಷಿ ಕೊಡುತ್ತಾ ನಟನೆಗೆ ಅವರಿಗೆ ಪ್ರಶಸ್ತಿ ಬರುತ್ತಿತ್ತು. ಬಿಸಿಯಾಗದೇ ಬೆಣ್ಣೆ ಕರಗದು ಎನ್ನುವಂತೆ ಎಷ್ಟು ಬಿಸಿ ಇರುತ್ತದೆಯೋ ಅಷ್ಟು ಬೇಗ ಮತ್ತು ಜಾಸ್ತಿ ಬೆಣ್ಣೆ ಕರಗುತ್ತದೆ ಎನ್ನುವುದು ಕೂಡ ನಿಜ. ಮೊದಲನೇಯದಾಗಿ ಜಮೀರ್ ಯಾವಾಗ ಏನು ಮಾತನಾಡಿದ್ರು ಎನ್ನುವುದನ್ನು ನೋಡೋಣ. ಮೊನ್ನೆ ಶ್ರೀಲಂಕಾಕ್ಕೆ ಹೋಗಿಯೇ ಇಲ್ಲ ಎಂದಿದ್ರು. ನಿನ್ನೆಯಿಂದ ಹೋಗಿದ್ದೆ ಎನ್ನುತ್ತಿದ್ದಾರೆ. ಇವತ್ತು ನನ್ನ ಜೊತೆ ಕುಮಾರಸ್ವಾಮಿಯವರು ಕೂಡ ಬಂದಿದ್ರು ಎಂದು ಹೇಳುತ್ತಿದ್ದಾರೆ. ಇನ್ನು ಕೆಲವು ದಿನಗಳ ಬಳಿಕ ಇನ್ಯಾರದ್ದೋ ಹೆಸರುಗಳು ಕೂಡ ಬಂದರೂ ಬರಬಹುದು. ಜಮೀರ್ ಹೀಗೆ ಹೇಳಿದ ಕೂಡಲೇ ಕುಮಾರಣ್ಣ ಎಚ್ಚರಗೊಂಡಿದ್ದಾರೆ. ಈಗ ಸದ್ಯ ಕುಮಾರಸ್ವಾಮಿಯವರು “ತಾವು ಶ್ರೀಲಂಕಾಕ್ಕೆ ಹೋಗಿರುವುದು ನಿಜ. ತಮ್ಮೊಂದಿಗೆ 39 ಶಾಸಕರು ಕೂಡ ಇದ್ದರು. ಅದರಲ್ಲಿ ಜಮೀರ್ ಕೂಡ ಸೇರಿದ್ರು. ನಾನು ಅವರೊಂದಿಗೆ ಹೋಗಿಲ್ಲ. ಅವರು ನನ್ನೊಂದಿಗೆ ಬಂದಿದ್ರು” ಎಂದು ಹೇಳಿಕೆ ಕೊಟ್ಟಿದ್ದಾರೆ. ಯಾರು ಯಾರ ಜೊತೆಗೆ ಹೋಗಿದ್ರೂ ಖರ್ಚು ಮಾತ್ರ ಜಮೀರ್ ಅವರೇ ಕೊಟ್ಟಿರಬಹುದು ಎನ್ನುವುದರಲ್ಲಿ ಸಂಶಯವಿಲ್ಲ. ಯಾಕೆಂದರೆ ಇಂತಹ ಹಲವು ಗಟ್ಟಿಕುಳಗಳನ್ನು ಜಿಡಿಎಸ್ ತನ್ನ ಜೊತೆ ಇಟ್ಟುಕೊಂಡಿರುವುದರಿಂದ ಪಕ್ಷದ ತಿಂಡಿ, ತೀರ್ತ, ತಿರುಗಾಟದ ಖರ್ಚು ಅದರಲ್ಲಿಯೇ ಹೋಗುತ್ತದೆ. ಅಂತಹ ಶ್ರೀಮಂತರು ಮುಂದೆ ಶಾಸಕರು, ಮಂತ್ರಿಗಳು ಅವರ ಪಕ್ಷದಲ್ಲಿ ಆಗುತ್ತಾರೆ. ಒಟ್ಟಿನಲ್ಲಿ 2014 ರಲ್ಲಿ ಕುಮಾರಣ್ಣ ಹೋಗಿದ್ದು ಹೌದಾದರೆ ಯಾಕೆ ಎನ್ನುವ ಪ್ರಶ್ನೆ ಕೂಡ ಮೂಡುತ್ತೆ. ಅವರ ಪ್ರಕಾರ ಪಕ್ಷದ ಕಾರ್ಯಚಟುವಟಿಕೆಗಳನ್ನು ಚರ್ಚಿಸಲು ಹೋಗಿದ್ದೆ ಎನ್ನುತ್ತಾರೆ. ಬಹುಶ: ಬೆಳಿಗ್ಗೆ ಪಕ್ಷ ಬಲಪಡಿಸಲು ಚರ್ಚಿಸಿ ನಂತರ ಸಂಜೆ ಅವರು ಜಮೀರ್ ಹೇಳಿದ ಕಡೆ ಸುತ್ತಾಡಿರಲೂಬಹುದು. ಅಲ್ಲಿ ಅವರಿಗೆ ಬೇರೆ ಬೇರೆ ರೀತಿಯ ಖುಷಿ ಸಿಕ್ಕಿರಲೂ ಸಾಕು. ಹಾಗಂತ ಕುಮಾರಸ್ವಾಮಿಯವರಿಗೆ ಸಂಜನಾ ಅವರಂತವರನ್ನು ಭೇಟಿಯಾಗಲು ಕೊಲಂಬೊಗೆ ಹೋಗಬೇಕೆಂದೆನಿಲ್ಲ. ಅವರು ಆ ವಿಷಯದಲ್ಲಿ ಬಿಂದಾಸ್.