ಸ್ವಾತಂತ್ರ್ಯ ಬಂದ ಬಳಿಕ ಪ್ರಪ್ರಥಮ ಬಾರಿ ಮಿಜೋರಾಂನ ರಾಜಧಾನಿಗೆ ರೈಲು ಸಂಪರ್ಕ!

ಮಿಜೋರಾಂ: ದೇಶ ಸ್ವಾತಂತ್ರ್ಯ ಪಡೆದ 78 ವರ್ಷಗಳ ನಂತರ, ಮಿಜೋರಾಂ ರಾಜ್ಯದ ರಾಜಧಾನಿ ಐಜ್ವಾಲ್ ಇದೀಗ ಭಾರತದ ರೈಲು ನಕ್ಷೆಯಲ್ಲಿ ಸ್ಥಾನ ಪಡೆದಿದೆ. ಈ ಸಾಧನೆಯ ಪ್ರಮುಖ ಹಂತವಾಗಿ, ಬೈರಾಬಿ–ಸೈರಾಂಗ್ ರೈಲು ಮಾರ್ಗ ಈಗ ಸಿದ್ಧವಾಗಿದ್ದು, ಸ್ಥಳೀಯ ಜನತೆಗೆ ಜೀವನಾಡಿಯಾಗಿ ಪರಿಣಮಿಸಿದೆ.

ಪ್ರಯಾಣಿಕರ ಸಂಚಾರ ಸುಲಭವಾಗುವುದರೊಂದಿಗೆ ವ್ಯಾಪಾರ ಅವಕಾಶಗಳೂ ಹೆಚ್ಚಲಿವೆ. ಸೆಪ್ಟೆಂಬರ್ 13ರಂದು ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ಈ ರೈಲು ಮಾರ್ಗಕ್ಕೆ ಹಸಿರು ನಿಶಾನೆ ತೋರಿಸಿ ಅಧಿಕೃತವಾಗಿ ಉದ್ಘಾಟಿಸಲಿದ್ದಾರೆ.

ಈ ಮಾರ್ಗದ ಮೂಲಕ ಕೊಲ್ಕತ್ತಾ, ಆಗರ್ತಲಾ ಹಾಗೂ ದೆಹಲಿಗೆ ರೈಲು ಸೇವೆ ಲಭ್ಯವಾಗಲಿದೆ. ಹಿಂದಿನ ಹಲವಾರು ಸಮೀಕ್ಷೆಗಳು ಯಶಸ್ವಿಯಾಗದೆ ಬಿಟ್ಟಿದ್ದರೂ, ರಾಷ್ಟ್ರೀಯ ಯೋಜನೆಯ ಸ್ಥಾನಮಾನ ದೊರಕಿದ ನಂತರವೇ ಸಮೀಕ್ಷೆ ಪೂರ್ಣಗೊಂಡಿತು. ಇದರಿಂದ ಮಿಜೋರಾಂ ಇತರೆ ರಾಜ್ಯಗಳೊಂದಿಗೆ ರೈಲು ಸಂಪರ್ಕ ಹೊಂದುತ್ತದೆ.

ಈ ಯೋಜನೆಯಿಂದ ಈಶಾನ್ಯ ಭಾರತದ ಎಂಟು ರಾಜ್ಯಗಳಲ್ಲಿ ನಾಲ್ಕು ರಾಜ್ಯಗಳು — ತ್ರಿಪುರ (ಆಗರ್ತಲಾ), ಅಸ್ಸಾಂ (ಡಿಸ್ಪುರ), ಅರುಣಾಚಲ ಪ್ರದೇಶ (ಇಟಾನಗರ) ಹಾಗೂ ಮಿಜೋರಾಂ (ಐಜ್ವಾಲ್) — ನೇರವಾಗಿ ರೈಲು ಜಾಲಕ್ಕೆ ಸಂಪರ್ಕಿಸಲ್ಪಟ್ಟಿವೆ. ಇದು ಈಶಾನ್ಯ ಭಾರತದ ಸಾಮಾಜಿಕ–ಆರ್ಥಿಕ ಅಭಿವೃದ್ಧಿಗೆ ಕ್ರಾಂತಿ ತಂದೀತು.

ಯೋಜನೆಯ ಪ್ರಮುಖ ವೈಶಿಷ್ಟ್ಯಗಳು:

• 51 ಕಿಲೋಮೀಟರ್ ಉದ್ದದ ರೈಲು ಮಾರ್ಗವು ಕಠಿಣ ಪರ್ವತ ಪ್ರದೇಶದ ಮೂಲಕ ಹಾದು ಹೋಗುತ್ತದೆ.

• ಈ ಯೋಜನೆಗೆ 2008–09ರಲ್ಲಿ ರಾಷ್ಟ್ರೀಯ ಯೋಜನೆ ಸ್ಥಾನಮಾನ ಸಿಕ್ಕಿತು.

• 2014ರಲ್ಲಿ ಪ್ರಧಾನಮಂತ್ರಿ ಮೋದಿ ಅಡಿಗಲ್ಲು ಇಟ್ಟು, 11 ವರ್ಷದ ಪರಿಶ್ರಮದ ಬಳಿಕ ಯೋಜನೆ ಪೂರ್ಣಗೊಂಡಿದೆ.

• ಈಗಾಗಲೇ 4 ನಿಲ್ದಾಣಗಳು ನಿರ್ಮಾಣಗೊಂಡಿವೆ.

• ಒಟ್ಟು 48 ಸುರಂಗಗಳು ನಿರ್ಮಾಣಗೊಂಡಿದ್ದು, ಅವುಗಳ ಉದ್ದ ಸುಮಾರು 13 ಕಿಮೀ.

• 55 ದೊಡ್ಡ ಸೇತುವೆಗಳು ಮತ್ತು 27 ಸಣ್ಣ ಸೇತುವೆಗಳು ನಿರ್ಮಿಸಲ್ಪಟ್ಟಿವೆ.

• ಪ್ರಮುಖ ಸೇತುವೆಯ ಎತ್ತರ 104 ಮೀಟರ್ ಆಗಿದ್ದು, ಇದು ದೆಹಲಿಯ ಕುತುಬ್ ಮಿನಾರ್ (72.5 ಮೀ) ಗಿಂತಲೂ ಎತ್ತರವಾಗಿದೆ.

ಈ ಮಾರ್ಗದಲ್ಲಿ ರೈಲುಗಳು ಗರಿಷ್ಠ 110 ಕಿಮೀ ವೇಗದಲ್ಲಿ ಸಂಚರಿಸಲಿವೆ. ಬೈರಾಬಿಯಿಂದ ಐಜ್ವಾಲ್‌ಗೆ ಈ ಹಿಂದೆ 5–6 ಗಂಟೆಗಳ ಪ್ರಯಾಣ ಬೇಕಾಗುತ್ತಿದ್ದರೆ, ಈಗ ಕೇವಲ 1 ರಿಂದ 1.5 ಗಂಟೆಗಳಲ್ಲಿ ತಲುಪಬಹುದು.