ಬಿಲ್ಲವರಿಗಿಂತ ಬ್ಯಾರಿಗಳೇ ಮೇಲಾದರೆ ಜಗದೀಶ್ ಅಧಿಕಾರಿ ಎಸ್ ಡಿಪಿಐ ಸೇರಲಿ!!

ಅಂತಹ ಜಗದೀಶ್ ಅಧಿಕಾರಿಯವರಿಗೆ ಈಗ ಆಧುನಿಕ ತಂತ್ರಜ್ಞಾನ ಮುಂದುವರೆದಿರುವುದು ಗೊತ್ತಿಲ್ಲವೋ ಅಥವಾ ಅವರ ಸಮಯವೇ ಸರಿಯಿಲ್ಲವೋ ಏನೋ. ಮೈಕ್ ಮುಂದೆ ನಿಂತು ಕಾರ್ಯಕ್ರಮವೊಂದರಲ್ಲಿ ಬಿಲ್ಲವರ ಆರಾಧ್ಯಶಕ್ತಿ ಕೋಟಿ ಚೆನ್ನಯ್ಯ ಹಾಗೂ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಯ ರಾಜಕೀಯ ಹೈಕಮಾಂಡ್ ಆಗಿದ್ದ ಜನಾರ್ಧನ ಪೂಜಾರಿಯವರ ಬಗ್ಗೆ ಅವರ ಅಭಿಮಾನಿಗಳಿಗೆ ಬೇಸರವಾಗುವಂತೆ ಮಾತನಾಡಿದ್ದಾರೆ. ಬಿಲ್ಲವರಿಗಿಂತ ಬ್ಯಾರಿಗಳೇ ಮೇಲು ಎನ್ನುವ ಅರ್ಥದ ಮಾತುಗಳನ್ನು ಆಡಿದ್ದಾರೆ. ಅವರ ಭಾಷಣದ ತುಣುಕು ಎಲ್ಲಾ ಕಡೆ ವೈರಲ್ ಆಗಿದೆ. ಏಕಕಾಲದಲ್ಲಿ ತಮ್ಮ ಕಾಲ ಮೇಲೆ ಇಟ್ಟಿಗೆ ಅಲ್ಲ, ಬಂಡೆ ಕಲ್ಲನ್ನೇ ಎಳೆದು ಹಾಕಿ ಜಗದೀಶ್ ಅಧಿಕಾರಿ ತಮ್ಮ ವಿರುದ್ಧ ಜನರು ಸಿಡಿದೇಳುವಂತೆ ಮಾಡಿದ್ದಾರೆ. ಇಲ್ಲಿ ಮೂರ್ನಾಕು ವಿಷಯಗಳು ಸಾಕಷ್ಟು ಸುದ್ದಿಯಾಗಿರುವುದು ಎಲ್ಲರಿಗೂ ತಿಳಿದಿದೆ. ಕೋಟಿ ಚೆನ್ನಯ್ಯ ಅವರು ಪೌರಾಣಿಕ ಶಕ್ತಿಗಳು. ಆ ಶಕ್ತಿಗಳ ಬಗ್ಗೆ ಏನೂ ಗೊತ್ತಿಲ್ಲದವರು ಒಂದು ವಾಕ್ಯ ಕೂಡ ಹಗುರವಾಗಿ ಮಾತನಾಡುವುದು ಬಿಡಿ, ವಿಷಯ ಮುಟ್ಟುವುದಕ್ಕೂ ಹೋಗಬಾರದು. ಇನ್ನು ಜನಾರ್ಧನ ಪೂಜಾರಿ. ಅವರು ಯಾವುದೇ ಪಕ್ಷದಲ್ಲಿ ಇರಲಿ, ಅವರು ಆ ಪಕ್ಷದ ಆಸ್ತಿ ಇದ್ದ ಹಾಗೆ. ರಾಷ್ಟ್ರದಲ್ಲಿ ಅಟಲ್ ಬಿಹಾರಿ ವಾಜಪೇಯಿಯವರು ಇದ್ದ ಹಾಗೆ, ಕರಾವಳಿಗೆ ಜನಾರ್ಧನ ಪೂಜಾರಿ. ತಮ್ಮ ಆರು ದಶಕಗಳ ರಾಜಕೀಯ ಜೀವನದಲ್ಲಿ ಎಲ್ಲಿಯೂ ಕಪ್ಪುಚುಕ್ಕೆ ಇಲ್ಲದ ರಾಜಕೀಯ ಸಂತನಂತೆ ಬದುಕಿ ಮಾದರಿಯಾದವರು ಜನಾರ್ಧನ ಪೂಜಾರಿ. ಸಂಸದ, ಕೇಂದ್ರ ಮಂತ್ರಿ, ರಾಜ್ಯ ಕಾಂಗ್ರೆಸ್ ಅಧ್ಯಕ್ಷರಾಗಿದ್ದ ಪೂಜಾರಿಯವರು ಅಕ್ಷರಶ: ಇಂದಿರಾ ಗಾಂಧಿ ಹಾಗೂ ಮನಮೋಹನ್ ಸಿಂಗ್ ಅವರ ಎಡಬಲದಲ್ಲಿ ಕುಳಿತುಕೊಳ್ಳುವಷ್ಟು ಅಧಿಕಾರ ಕೇಂದ್ರದಲ್ಲಿದ್ದವರು. ಅಂತವರ ಬಗ್ಗೆ ರಾಜಕೀಯದಲ್ಲಿ ಅಂಬೆಗಾಲು ಹಾಕುವವರು ಮಾತನಾಡಲೇಬಾರದು. ಇನ್ನು ಬಿಲ್ಲವರಿಗಿಂತ ಬ್ಯಾರಿಗಳೇ ಮೇಲು ಎಂದು ಒಬ್ಬ ಬಿಜೆಪಿ ಮುಖಂಡ ಹೇಳುವುದೇ ಪರಮ ಅಸಹ್ಯ. ಇನ್ನು ಎದುರಿಗೆ ಬಿಲ್ಲವರನ್ನು ಹೊಗಳಿ ಹಿಂದಿನಿಂದ ತೆಗಳಿರುವುದು ಕೂಡ ಕೆಲವರಿಗೆ ಸಾಕ್ಷ್ಯ ದೊರೆತಿದೆ ಎಂದು ಹೇಳಲಾಗುತ್ತಿದೆ. ರಾಜಕೀಯದ ಏಣಿಯಲ್ಲಿ ಮೇಲೆ ಹತ್ತಲು ತಯಾರಾದ ಯಾವುದೇ ರಾಜಕಾರಣಿ ತನ್ನ ದೇಹದಲ್ಲಿರುವ ಎರಡು ಕಣ್ಣುಗಳು ಯಾವುದಕ್ಕೂ ಸಾಲುವುದಿಲ್ಲ ಎನ್ನುವ ಎಚ್ಚರಿಕೆಯನ್ನು ವಹಿಸಬೇಕು. ಹಿಂದಿನ ಕಾಲದಲ್ಲಿ ಆಧುನಿಕ ತಂತ್ರಜ್ಞಾನ ಏನೂ ಇಲ್ಲದೆ ಇದ್ದ ಕಾಲದಲ್ಲಿ ಏನು ಹೇಳಿದರೂ ನಡೆಯುತ್ತಿತ್ತು. ನನ್ನ ಹೇಳಿಕೆ ತಿರುಚಲಾಗಿದೆ ಎನ್ನುವುದು ಸಾಧ್ಯವಿತ್ತು. ಈಗ ಅದು ಸಾಧ್ಯವಿಲ್ಲ. ಇದೇ ಜಗದೀಶ್ ಅವರಿಗೆ ಸಂಚಕಾರ ಬಂದಿರುವುದು. ಸಾಲಮೇಳದಿಂದ ಹಿಡಿದು ಪಾಲಿಕೆಯ ವ್ಯಾಪ್ತಿಯಲ್ಲಿ ಸ್ವಯಂಘೋಷಿತ ಆಸ್ತಿ ತೆರಿಗೆ ತಡೆಹಿಡಿಯುವ ತನಕ ಪೂಜಾರಿ ಪಕ್ಷಾತೀತವಾಗಿ ಎಲ್ಲರ ಮನ ತಲುಪಿದವರು. ಇನ್ನು ಬಿಲ್ಲವರಿಗಿಂತ ಬ್ಯಾರಿಗಳೇ ಮೇಲಾದರೆ ಜಗದೀಶ್ ಬಿಜೆಪಿಗೆ ರಾಜೀನಾಮೆ ಕೊಟ್ಟು ಕಾಂಗ್ರೆಸ್ ಅಥವಾ ಎಸ್ ಡಿಪಿಐಗೆ ಸೇರಬಹುದಲ್ಲ. ಅಂತಿಮವಾಗಿ ತಮ್ಮ ಕ್ಷಮೆಯಾಚನೆಯಿಂದ ಈ ಪ್ರಕರಣ ಮುಗಿಯುತ್ತದೆ ಎಂದು ಜಗದೀಶ್ ಅಧಿಕಾರಿ ಅಂದುಕೊಂಡಿದ್ದರೆ ಅದು ಅವರ ಊಹೆ. ಏನೇ ಆಗಲಿ, ಈ ಘಟನೆಯಿಂದ ಅಧಿಕಾರಿ ತಮ್ಮ ರಾಜಕೀಯ ಮಹತ್ವಾಕಾಂಕ್ಷೆಗೆ ತಾವೇ ಬ್ರೇಕ್ ಹಾಕಿದ್ದಾರೆ. ಅವರ ರಾಜಕೀಯ ಜೀವನದ ಗಾಡಿ ಬ್ರೇಕ್ ಫೇಲ್ ಆಗಿದೆ. ಇದು ಅವರ ವೈಯಕ್ತಿಕ ಹೇಳಿಕೆ ಎಂದು ಹೇಳಿ ಅವರನ್ನು ಆರು ವರ್ಷಗಳ ತನಕ ಪಕ್ಷದಿಂದ ಅಮಾನತು ಮಾಡಿದರೆ ಪಕ್ಷಕ್ಕೆ ಕ್ಷೇಮ. ಇಲ್ಲದಿದ್ದರೆ ಜಗದೀಶ್ ಅಧಿಕಾರಿ ತಮ್ಮೊಂದಿಗೆ ಪಕ್ಷವನ್ನು ಕೂಡ ಮುಳುಗಿಸಿಬಿಟ್ಟರು ಎಂದೇ ಅರ್ಥ!