ರಜನಿ ಜತೆಗೆ ರಾಜಕೀಯ ಎಂಟ್ರಿಗೆ ಸಿದ್ಧ : ಕಮಲ್

ಚೆನ್ನೈ : ತಿಂಗಳಾಂತ್ಯಕ್ಕೆ ಸಕ್ರಿಯ ರಾಜಕಾರಣಕ್ಕೆ ಧುಮುಕುತ್ತೇನೆ ಎಂದಿದ್ದ ಪಂಚಭಾಷಾ ನಟ ಕಮಲ್ ಹಾಸನ್, ಈಗ ಮತ್ತೊಂದು ಹೊಸ ಲಡ್ಡುವನ್ನು ತಮಿಳು ಸಿನಿಮಾ ರಸಿಕರ ಬಾಯಿಗೆ ಹಾಕಿದ್ದಾರೆ. ಪರದೆ ಮೇಲೆ ರಜನಿ-ಕಮಲ್ ಜೋಡಿ ಕಂಡು ಹುಚ್ಚೆದ್ದು ಕುಣಿಯುವವರು, ರಾಜಕೀಯದಲ್ಲಿಯೂ ಒಂದೇ ಪಕ್ಷದಲ್ಲಿ ಒಟ್ಟಾಗಿ ಕಾಣಿಸಿಕೊಳ್ಳುವ ಸುಳಿವು ನೀಡಿದ್ದಾರೆ.

” ಒಂದು ವೇಳೆ ಸೂಪರ್‍ಸ್ಟಾರ್ ರಾಜಕೀಯ ಪ್ರವೇಶಿಸಿದರೆ, ಅವರೊಂದಿಗೆ ಸೇರಿ ಕೆಲಸಮಾಡಲು ನಾನು ಹಿಂದೇಟು ಹಾಕೊಲ್ಲ” ಎನ್ನುವ ಮೂಲಕ ಕಮಲ್ ರಜನಿ ಹೊಸ ಪಕ್ಷ ಕಟ್ಟಿದರೆ ತಮ್ಮ ಬೆಂಬಲವಿದೆ ಎಂದು ಪರೋಕ್ಷವಾದ ಸಂದೇಶ ರವಾನಿಸಿದ್ದಾರೆ. ತಮಿಳುನಾಡು ಜನರನ್ನು ಉದ್ದೇಶಿಸಿ” ನನಗೆ ಒಂದು ಸದೃಢ ಸಂದೇಶ ಕೊಡಿ. ನಾನು ರಜನಿ ಚಿತ್ರೋದ್ಯಮದಲ್ಲಿ ಎದುರಾಳಿಗಳಿರಬಹುದು. ಆದರೆ ಪ್ರಮುಖ ವಿಚಾರಗಳನ್ನು ಒಟ್ಟಾಗಿ ಕುಳಿತು ಬಗೆಹರಿಸಿಕೊಳ್ಳಬಹುದಾದ ಆತ್ಮೀಯತೆ ಉಳಿಸಿಕೊಂಡು ಬಂದಿದ್ದೇವೆ. ಅದರಂತೆ ರಜನಿ ರಾಜಕೀಯ ಪ್ರವೇಶದೊಂದಿಗೆ ಕೈಜೋಡಿಸದೆಯೇ ಇರುತ್ತೇನೆಯೇ?” ಎಂದು ಪ್ರಶ್ನಿಸಿದ್ದಾರೆ.

ತಮಿಳಿನಲ್ಲಿ ಬಿಗ್‍ಬಾಸ್ ಅವತರಿಣಿಕೆಯನ್ನು ನಿರೂಪಿಸುತ್ತಿರುವ ಕಮಲ್, ಮಾಸಾಂತ್ಯಕ್ಕೆ ಚಿತ್ರೀಕರಣ ಮುಗಿಸಿ ರಾಜಕೀಯದಲ್ಲಿ ಸಕ್ರಿಯರಾಗುವ ಸುಳಿವು ಸ್ಪಷ್ಟಪಡಿಸಿದ್ದಾರೆ. ಆಡಳಿತಾರೂಢ ಎಐಎಡಿಎಂಕೆ ವಿರುದ್ಧ ಕಮಲ್ ನಿರಂತರ ವಾಗ್ದಾಳಿ ನಡೆಸುತ್ತಾ ಬಂದಿದ್ದಾರೆ.