ಬಂದ್ ಎಡಪಕ್ಷಗಳಿಗೆ ಫ್ಯಾಶನ್ ಆಗಿರುವುದು ಜನರಿಗೆ ಗೊತ್ತಾಗಿದೆ!!

ಬರುವುದೇ ಹತ್ತು ಗಂಟೆಗೆ, ಹತ್ತೂವರೆಗೆ ಕಾಫಿ, ಮಧ್ಯದಲ್ಲಿ ಫ್ಯಾನ್, ಎಸಿಯ ತಂಪಿನಲ್ಲಿ ಕೆಲಸ ಮಾಡಿದಂತೆ ಮಾಡಿ ಊಟಕ್ಕೆ ಬ್ರೇಕ್. ಝೀರೋ ಬಡ್ಡಿ ಸಾಲ, ವರ್ಷಕ್ಕೆ ಟೂರ್, ಫ್ರೀ ಮೆಡಿಕಲ್ ಎಲ್ಲಾ ಸೇರಿಸಿದರೆ ಬ್ಯಾಂಕು ಕೆಲಸ ಎಂದರೆ ಅದೊಂದು ರೀತಿಯಲ್ಲಿ ಸ್ವರ್ಗದಲ್ಲಿ ಹಾಸಿಗೆ ಹಾಸಿದಂತೆ. ಅಂತವರು ಇನ್ನು ಸೌಲಭ್ಯಕ್ಕಾಗಿ ಹೋರಾಟಕ್ಕೆ ಇಳಿಯುತ್ತಾರೆ ಎಂದರೆ ಒಂದು ರೂಪಾಯಿ ಕೊಡಲ್ಲ, ಕೊಟ್ಟದ್ದೇ ಜಾಸ್ತಿಯಾಗಿದೆ, ಬೇಕಿದ್ರೆ ಮಾಡಿ, ಇಲ್ಲದಿದ್ದರೆ ರೈಟ್ ಹೇಳಿ ಎಂದು ಹೇಳಿಬಿಡಬೇಕು.
ಒಂದು ಪ್ರತಿಭಟನೆ ವಿಫಲವಾಗುವುದು ಸಂಘಟಕರ ಬಳಿ ಸರಿಯಾದ ವಿಷಯ ಇಲ್ಲದೇ ಇರುವುದರಿಂದ. ಇವತ್ತಿಗೆ ಎಷ್ಟೋ ಕೆಲಸಗಳಿಗೆ ಜನ ಸಿಗದೇ ಮಾಲೀಕರು ಸಂಕಷ್ಟ ಅನುಭವಿಸುತ್ತಾರೆ. ಕೃಷಿಯಲ್ಲಿ ದುಡಿಯಲು ಮನಸ್ಸಿಲ್ಲದೆ ಯುವಕರು ನಗರಕ್ಕೆ ಬರುತ್ತಿದ್ದಾರೆ. ಅಲ್ಲಿ ಕೃಷಿ ಜಮೀನುಗಳು ಪಾಲು ಬೀಳುತ್ತಿವೆ. ಹಾಗಂತ ಉದ್ಯೋಗಗಳು ಕಡಿಮೆಯಾಗಲು ಮತ್ತೊಂದು ಕಾರಣ ಈಗ ರೂಪಾಯಿ ಅಪಮೌಲ್ಯವಾಗಿರುವುದರಿಂದ ಕೆಲವು ಬ್ಲ್ಯಾಕ್ ಮನಿಯಿಂದ ಓಡುತ್ತಿದ್ದ ಕಾರ್ಖಾನೆಗಳು ಮುಚ್ಚಿರಬಹುದು. ಜಿಎಸ್ ಟಿಯಿಂದ ವ್ಯಾಪಾರಿಗಳು ಅಗತ್ಯಕ್ಕೆ ತಕ್ಕಷ್ಟೇ ದಾಸ್ತಾನು ಮಾಡುತ್ತಾ ಇರಬಹುದು. ಇದೆಲ್ಲದರಿಂದ ಉದ್ಯೋಗಗಳು ಕಡಿಮೆ ಆಗಿರಬಹುದು. ಆದರೆ ಸರಕಾರಗಳು ಈ ಸಮಸ್ಯೆಗಳು ಆಗಲಿ ಎಂದು ಬಯಸಿ ಕಾನೂನು ತರುವುದಿಲ್ಲ. ಕೆಲವೊಮ್ಮೆ ದೇಶದಲ್ಲಿ ಆರ್ಥಿಕ ಶಿಸ್ತು ತರಲು ಕೆಲವು ನಿಯಮಗಳನ್ನು ತರಬೇಕಾಗುತ್ತದೆ. ಆಗ ಒಂದಿಷ್ಟು ಸಮಯ ವ್ಯವಸ್ಥೆ ಹೆಚ್ಚು ಕಡಿಮೆ ಆಗುತ್ತದೆ. ಆದರೆ ಅದೆಲ್ಲ ಕ್ಷಣಿಕ. ಅದೆಲ್ಲ ಗೊತ್ತಿರುವುದರಿಂದ ಜನ ಎಡಪಕ್ಷಗಳ ಹೋರಾಟಕ್ಕೆ ಬೆಂಬಲ ಕೊಡುತ್ತಿಲ್ಲ. ಅದಕ್ಕೆ ಬಂದ್ ನೀರಸವಾಗಿದೆ. ಕರಾವಳಿಯಲ್ಲಿ ಎಡಪಕ್ಷಗಳಿಗೆ ಅಂತಹ ಬೆಂಬಲ ಇಲ್ಲದೇ ಇರಬಹುದು. ಆದರೆ ಕಾರ್ಮಿಕರು ಎಲ್ಲಾ ಕಡೆ ಕಾರ್ಮಿಕರೇ ಅಲ್ವಾ? ಅವರ್ಯಾಕೆ ಬೆಂಬಲ ಕೊಟ್ಟಿಲ್ಲ. ವಿಷಯ ಏನೆಂದರೆ ಮಂಗಳೂರಿನ ಜನ ಪ್ರಜ್ಞಾವಂತರು. ಅವರಿಗೆ ಬಂದ್, ಮುಷ್ಕರ ಎಲ್ಲಾ ನೋಡಿ ಸಾಕಾಗಿದೆ. ಸರಿಯಾಗಿ ದುಡಿದರೆ ಮಾತ್ರ ನಾಲ್ಕು ಕಾಸು ಎನ್ನುವುದು ಗೊತ್ತಿದೆ. ಇನ್ನು ಎಡಪಕ್ಷಗಳ ಹೋರಾಟದ ಹಿಂದೆ ಅದರ ನಾಯಕರಿಗೆ ಮಾತ್ರ ಲಾಭ ಆಗುತ್ತದೆ ಎಂದು ಅರಿವಿದೆ. ಎಲ್ಲಕ್ಕಿಂತ ಹೆಚ್ಚಾಗಿ ಮೋದಿ ಕೇಂದ್ರದಲ್ಲಿ ಇರುವುದರಿಂದ ವಿಶ್ವಾಸವಿದೆ !!