ಕಳ್ಳರ ಮನಸ್ಸು ಹುಳ್ಳಗೆ; ಅದಕ್ಕೆ ವಾರ್ಡ ಕಮಿಟಿ ಆಗಿಲ್ಲ!

ವಾರ್ಡ ಕಮಿಟಿ ವಿಷಯದಲ್ಲಿಯೂ ಆದದ್ದು ಇದೇ. ಅಷ್ಟಕ್ಕೂ ವಾರ್ಡ ಕಮಿಟಿ ಪಾಲಿಕೆ ಸದಸ್ಯರು ಅಥವಾ ಆಯಾ ಪಕ್ಷದ ಮುಖಂಡರು ನಾಗರಿಕರಿಗೆ ಕೊಡುವ ಭಿಕ್ಷೆ ಅಲ್ಲ. ಅವರು ವಾರ್ಡ ಕಮಿಟಿ ಮಾಡಿದರೆ ನಾಗರಿಕರ ಹೊಟ್ಟೆ ತುಂಬಲ್ಲ. ವಾರ್ಡ ಕಮಿಟಿ ಮಾಡದಿದ್ದರೂ ನಾಗರಿಕರ್ಯಾರು ಕೂಡ ಬೀದಿಗೆ ಬೀಳಲ್ಲ. ಆದರೂ ವಾರ್ಡ ಕಮಿಟಿ ಆಗಲೇಬೇಕು. ಅಷ್ಟಕ್ಕೂ ಈ ಮಾತನ್ನು ನಾನು ಹೇಳುತ್ತಿಲ್ಲ. ಇದನ್ನು ಮಾನ್ಯ ಉಚ್ಚ ನ್ಯಾಯಾಲಯ ತನ್ನ ಆದೇಶದಲ್ಲಿ ಎಲ್ಲಾ ಮಹಾನಗರಪಾಲಿಕೆಗೆ ಸೂಚನೆ ಕೊಟ್ಟಿದೆ. ಇದೇ ಮಾತನ್ನು ಅಡಿಟರ್ಸ್ ತಮ್ಮ ರಿಪೋರ್ಟನಲ್ಲಿ ಕೇಳಿದ್ದಾರೆ. ಯಾಕೆ ವಾರ್ಡ ಕಮಿಟಿ ಮಾಡಿಲ್ಲ? ಅಷ್ಟಕ್ಕೂ ವಾರ್ಡ ಕಮಿಟಿ ಆಗುವುದರಿಂದ ಯಾರಿಗೆ ಲಾಭ? ಆಗದಿದ್ದರೆ ಯಾರಿಗೆ ಲಾಭ? ವಾರ್ಡ ಕಮಿಟಿ ಮಾಡುವುದೆಂದರೆ ಪಾಲಿಕೆ ಸದಸ್ಯರು ಯಾಕೆ ಹಿಂಜರಿಯುತ್ತಾರೆ ಎನ್ನುವುದೇ ಗೊತ್ತಾಗುವುದಿಲ್ಲ. ಒಂದು ವೇಳೆ ಅವರು ನೆಟ್ಟಗಿದ್ದರೆ ವಾರ್ಡ ಕಮಿಟಿ ಮಾಡುವುದಕ್ಕೆ ಮೊದಲು ಮುಂದೆ ಬರಬೇಕು. ವಾರ್ಡ ಕಮಿಟಿಯಿಂದ ಒಬ್ಬ ಪಾಲಿಕೆ ಸದಸ್ಯನಿಗೆ ನಿಜಕ್ಕೂ ವಾರ್ಡನ ಅಭಿವೃದ್ಧಿಯ ಹೊರೆ ಕಡಿಮೆಯಾಗುತ್ತದೆ. ಆದರೆ ಆತ ಅಥವಾ ಆಕೆ ಯಾಕೆ ವಾರ್ಡ ಕಮಿಟಿ ಮಾಡಲ್ಲ ಎಂದರೆ ಪಾಲಿಕೆ ಎನ್ನುವುದನ್ನು ಸೇವೆಯ ಕಾರ್ಯಕ್ಷೇತ್ರವಾಗಿ ಎಷ್ಟು ಸದಸ್ಯರು ನೋಡುತ್ತಿದ್ದಾರೆ. ಕೆಲವು ಸದಸ್ಯರಿಗೆ ವಾರ್ಡ ಕಮಿಟಿ ಆಗಬೇಕು ಎನ್ನುವುದು ಮನಸ್ಸಿನಲ್ಲಿ ಇರಬಹುದು. ಆದರೆ ಜನರಲ್ ಆಗಿ ಎಲ್ಲರೂ ಇದರಲ್ಲಿ ಕೈಜೋಡಿಸಲು ಬರುವುದೇ ಇಲ್ಲ. ಯಾಕೆಂದರೆ ಹೆಚ್ಚಿನವರಿಗೆ ಮನಪಾ ಎಂದರೆ ಫುಲ್ ಟೈಮ್ ಜಾಬ್. ಇಲ್ಲಿಯೇ ಹೊರಳುವುದು, ಅಲ್ಲಿಯೇ ಏಳುವುದು. ಒಂದು ವೇಳೆ ವಾರ್ಡ ಕಮಿಟಿ ಜಾರಿಗೆ ಬಂದರೆ ಆಯಾ wardನಲ್ಲಿ ಒಂದೊಂದು ಅಭಿವೃದ್ಧಿಶೀಲ ಮನಸ್ಸುಗಳ ಗುಂಪು ರೆಡಿಯಾಗುತ್ತದೆ. ಆ ತಂಡ ತಮ್ಮ wardನ ಸರ್ವತೋಮುಖ ಅಭಿವೃದ್ಧಿಯ ಬಗ್ಗೆ ರೂಪುರೇಶೆ ಸಿದ್ಧಪಡಿಸುತ್ತದೆ. ಎಲ್ಲಕ್ಕಿಂತ ಹೆಚ್ಚಾಗಿ ಭ್ರಷ್ಟಾಚಾರ ಕಡಿಮೆಯಾಗುತ್ತದೆ, ಬಹುಶ: ಸಂಪೂರ್ಣವಾಗಿ ನಿಂತು ಹೋಗಲು ಬಹುದು. ಇದೇ ಉದ್ದೇಶ ಇಟ್ಟುಕೊಂಡೇ ಕರ್ನಾಟಕ ಮುನಸ್ಸಿಪಾಲಿಟಿ ಆಕ್ಸ್ಟ 1976 ಚಾಪ್ಟರ್ 3-ಎ ನಲ್ಲಿ ಏರಿಯಾ ಸಭಾ ಅರ್ಥಾತ್ ವಾರ್ಡ ಕಮಿಟಿ ಆಗಲೇಬೇಕು ಎಂದು ಸ್ಪಷ್ಟಪಡಿಸಲಾಗಿದೆ. ಅದರ ಉದ್ದೇಶ ಇಷ್ಟೇ, ಭ್ರಷ್ಟಾಚಾರ ನಿಲ್ಲಿಸುವುದು. ಅಂದರೆ ಆವತ್ತೆ ಗೊತ್ತಿತ್ತು, ಸರಕಾರದಂತೆ ಆಳ್ವಿಕೆ ಮಾಡುವ ಸ್ಥಳೀಯಾಡಳಿತ ಸಂಸ್ಥೆಯಾಗಿರುವ ಮುನ್ಸಿಪಾಲಿಟಿಯಲ್ಲಿ ವಾರ್ಡ ಕಮಿಟಿಯಿಂದ ಮಾತ್ರ ಭ್ರಷ್ಟಾಚಾರ ನಿಲ್ಲುತ್ತೆ. ಆದರೆ ಈಗ 2020 ಬಂದು ಇನ್ನೇನೂ ಎರಡು ತಿಂಗಳ ಬಳಿಕ ಹೊಸ ವರುಷ ಬರುವ ಸಮಯ ಆದರೂ ವಾರ್ಡ ಕಮಿಟಿಯ ಸುಳಿವಿಲ್ಲ. ಹಾಗಾದ್ರೆ ವಾರ್ಡ ಕಮಿಟಿ ಆದರೆ ಮನಪಾ ಸದಸ್ಯ/ಸ್ಯೆಯ ಅಧಿಕಾರ ಮೊಟಕುಗೊಳ್ಳತ್ತಾ? ನೋ ಚಾನ್ಸ್. ವಾರ್ಡ ಕಮಿಟಿ ಆದರೆ ಒಬ್ಬ ಸದಸ್ಯನಿಗೆ ಹತ್ತು ಕೈಗಳು ಜೋಡಿಸಿದಂತೆ ಆಗುತ್ತದೆ. ಅಂದರೆ ಹತ್ತು ಜನರು ಸೇರಿ ಆ ವಾರ್ಡನ್ನು ಅಭಿವೃದ್ಧಿ ಮಾಡಿದಂತೆ ಆಗುತ್ತದೆ. ಹಾಗಾದ್ರೆ Corporatorಗೆ ಹೆದರಿಕೆ ಎನು? ನಿಜವಾಗಿ ಹೇಳಬೇಕೆಂದರೆ ಅಯಾ ವಾರ್ಡ ಕಮಿಟಿಗೆ ಅಲ್ಲಿನ ಸ್ಥಳೀಯ ಮನಪಾ ಸದಸ್ಯ/ಸ್ಯೆಯೇ ಅಧ್ಯಕ್ಷ/ಕ್ಷೆ. ಆದರೆ ಒಂದು ವ್ಯತ್ಯಾಸ ಎಂದರೆ ವಾರ್ಡ ಕಮಿಟಿ ಅಧ್ಯಕ್ಷರು ತಮಗೆ ಬೇಕಾದ ಹಾಗೆ ಕೆಲಸ, ಕಾಮಗಾರಿಗಳನ್ನು ಕೈಗೆತ್ತಿಗೊಳ್ಳುವಂತಿಲ್ಲ. ಅದನ್ನು ವಾರ್ಡ ಕಮಿಟಿಯ ಮುಂದೆ ಇಡಬೇಕು. ಅಷ್ಟಕ್ಕೂ ಅದರಲ್ಲೇನು ತಪ್ಪಿಲ್ಲ. ಪಾಲಿಕೆಯ ಸದಸ್ಯರು ಅವರ ಮನೆಯ ಕೆಲಸವೇನೂ ಮಾಡುವುದಲ್ಲವಲ್ಲ. ಹಾಗಾದರೆ ವಾರ್ಡನ ಕೆಲಸ ಮಾಡುವಾಗ ನಾಲ್ಕು ಜನರಲ್ಲಿ ಕೇಳುವುದರಲ್ಲಿ ತಪ್ಪೇನು? ಒಂದು ವೇಳೆ ತನ್ನ ವಾರ್ಡನಲ್ಲಿ ತಾನು ಬಯಸಿದ ಕಡೆಗಿಂತ ಬೇರೆ ಕಡೆ ಕೆಲಸ ಆಗುವ ಅಗತ್ಯ ಹೆಚ್ಚಿದ್ದಲ್ಲಿ ಅಲ್ಲಿ ಮಾಡಿಸುವುದರಲ್ಲಿ ತಪ್ಪೇನಿದೆ? ಕಾಮಗಾರಿ ಕಳಪೆ ಆಗುವುದಾದರೆ ಅಲ್ಲಿ ಹೋಗಿ ನೀವು ಮಾಡುತ್ತಿರುವುದು ಸರಿಯಿಲ್ಲ ಎಂದು ಜವಾಬ್ದಾರಿಯುತ ನಾಗರಿಕ ಹೇಳುವುದರಲ್ಲಿ ತೊಂದರೆ ಏನಿದೆ? ಒಂದೇ ಮಾತಿನಲ್ಲಿ ಹೇಳುವುದಾದರೆ ವಾರ್ಡ ಕಮಿಟಿಯಿಂದ ಊರಿನ ಅಭಿವೃದ್ಧಿಯೇ ವಿನ: ಬೇರೆ ಏನೂ ತೊಂದರೆ ಇಲ್ಲ. ಒಂದು ವೇಳೆ ಆವತ್ತು ಗುಜ್ಜರಕೆರೆ ಇರುವ wardನಲ್ಲಿ ವಾರ್ಡ ಕಮಿಟಿ ಇದ್ದಿದ್ರೆ ಆ ಒಂದು ಕೋಟಿ ಎಂಟು ಲಕ್ಷ ಉಳಿಯುತ್ತಿರಲಿಲ್ಲವೇ? ಇಂತಹ ಎಷ್ಟು ಕೋಟಿಗಳು ಇಲ್ಲಿಯ ತನಕ ವಾರ್ಡ ಕಮಿಟಿ ಜಾರಿಯಾಗದೇ ನಷ್ಟವಾಗಿ ಹೋಯಿತು.